陳巧文是八十後的表表者！？

今日，閱讀了兩篇關於兩個八十後奇女子的文章或報導，一篇是關於我們八十後的表表者－陳巧文，另一篇是關於一個無名的八十後女子。兩個人給我一個很好的題材去寫今天的日誌。

先講陳大小姐的一篇報導，昨日，陳大小姐聯同一幫八十後的青年，走到中聯辦門前示「威」，其間，有多次大大小小的衝突，有些示威者投訴警方以暴力打擊「和平」示威，有些示威者投訴警方打爆佢個咀。但示威者口中既「和平」示威，到底有幾和平呢？我想大家都心中有數。

你可能會諗，會唔會係傳媒偏袒示威者，只報導示威者被打、被摸胸的照片呢？但其實，傳媒都有報導警方一早已經講明，中聯辦門外係禁止標貼。班人就一於扮聾，以暴力衝擊警方防線，以致最後發生該疑似暴力事件。

其實我覺得件事，就好似一個司機，將架車停左係禁區上面，都講到明（其實唔講都明）唔得啦，又係要做，警察上前叫你落車俾車牌，當然係黑口黑面家啦，唔通同你好聲好氣，俾杯茶過你呀！？家陣個司機唔落車都不特止，重要開車，撞擊個警察。咁你諗下個警察會唔會唔還手呀啦。

其實，發生件咁既事，我身為八十後都真係幾心痛。一：點解一間香港咁出名既大學會出個諗野咁奇怪既學生。二：其實都零晨兩點幾，點解唔返屋企訓呀，你老母～～～好掛住你地。三：其實佢地有無諗過點解要咁做呀？而家似「搞事」多過似表達意見。

「不要問社會可以為你做什麼，你們應當問自己可以為社會做什麼。」明唔明呀陳大小姐，重有，唔好化太濃妝啦，上鏡唔好睇。

我真的生氣了，係你地令八十後蒙羞，同成為最新既潮吹（吹水既潮流）對象。

不過，當我係生氣的同時，看到一篇令人鼓舞的文章，文章內容大致如下：

「０３年畢業時正值沙士，最終幾經辛苦終於搵到一份同本科有關既工作，月薪八千，佢好記得自己第三個月出糧，亦係第一期grant loan還錢既時候。八千蚊月薪，四千蚊俾屋企，四千幾蚊還grant loan,一出糧乜錢都無洗過就嘔突，真係心傷。果陣唔好話買樓，開飯都有問題。（好有同感，我重還緊！）

佢努力做資料搜集，知道原來香港有好多只需花幾百蚊去考，但政府認可既資歷、證書。佢係半年間，放工後隔晚去上堂，再返屋企溫書，雖然辛苦，但考到唔少資歷、證書。

重新裝備後，佢再去搵工。結果僱主睇到佢呢半年不斷進修，覺得佢努力、肯學，終於請左佢。佢終於做到自己想做既工作，人工亦加左一倍，多左人工，但佢無亂洗錢，第一個目標唔係買樓，而係還GRANT LOAN。佢終於比還錢期限早三年一次過還哂GRANT LOAN。

06年佢同男友計劃結婚。佢地都係公屋妹、公屋仔，無咩家底，於是要一齊儲錢，亦計劃買樓。佢地都係慳家一族，環境最差既時候兩個人分一個美心快餐食，但日子就係咁過。而佢係一年半以來努力做資料搜集，睇下有咩適合既樓盤。係努力之下，08年佢地終於係市區買左一層約200萬既樓。

而係呢幾年，除左買樓，佢地仲係早幾個月前結左婚，婚禮所有洗費由佢地負責;佢仲係兩年前開始讀MASTER，今年結婚兼畢業。」

睇完篇文章，我真係１００個佩服佢呢個人，我自問做唔到。佢放棄去買名牌、買貴衫、幾乎無去過旅行。我係以前 big 4 做，一出糧最開心，因為可以係咁駛，買自己鍾意既野，年年去旅行，而家諗起都有ｄ慚愧。

姑勿論，佢「只得工作，沒有享樂」，但她沒有怨天尤人，只會諗方法令自己過得好一點，我可以好肯定咁講，佢識諗過陳大小姐一百萬倍。

雖然我唔知佢果名，但我覺得佢先係我地八十後的表表者！