再談大陸人在香港生活

http://www.youtube.com/watch?v=sxmooOwTfTk&feature=player_embedded

大家首先睇睇上面youtube片先.

早排, 寫左篇blog, 「而家唔係派或唔派既問題, 係點解派和點派既問題」, 講到生活在香港的大陸人, 覺得香港政府要俾6,000蚊人地. 此blog一出, 連我老婆都話我錯, 有乜理由俾佢地先. 佢地正如 youtube 入面既人, 佢地好比蝗蟲, 對香港無貢獻, 又想人幫, 重要繁殖能力果然好似蝗虫一樣咁勁, 一家九口, 我地香港人有乜理由幫 d 咁既「外來者」.

派, 基本上已成定局, 因為我覺得如果財爺今日同全香港市民講唔派, 我諗香港會發生開埠以來, 最大既一次上街行動, 雖然, 我覺得下年如果無錢派, 都會有好多市民上街. 如果下年好景, 市民會講好景都唔派? 如果下年唔好景, 市民又會要求政府幫下手, 係庫房分 d 俾人駛. 咁即係話, 四個字, 一定要派! 所以我都話「此例一開～後患無窮～」

所以我只係覺得已成定局, 香港政府就應該做到每一個香港市民都有得派. 現今好多香港人把「新移民」當作是「外來者」, 瓜分左「香港人」的社會福利, 造成香港社會的負累. 但其實部份經常被視為是「依賴者」的「新移民」, 正為香港發展付出她們的廉價勞動, 並且為養育香港未來的「廉價人力資源」擔負著大量的照顧工作. 試問, 有幾多香港人願意去做廉價勞動既工作, 無左呢班「香港人」口中既「外來者」, 香港又會點呢? 咁當然, 都有唔少既「新移民」係蝗蟲, 正如 youtube入面既一家九口.

之但係, 如果你問我果九口, 有無得派? 我會話如果你地班高官俾佢地有權係香港生活, 你就應該派. 點解? 因為係你地班高官, 好似怕香港無人會死咁, 係咁收人落唻. 又唔睇下佢地既背景, 應唔應付都香港既生活. 你俾得人落呢, 你就有義務去幫人係度生活.

呢個情況, 好比你收養左隻寵物返屋企, 點知隻寵物唔生性, 唔幫你收報紙, 俾拖鞋之餘, 重要咬爛你 d 梳化, 你就放佢地係一二邊, 唔俾飯佢食, 唔理佢, 由得佢自生自滅. 但係你記住, 佢重係住係你屋企, 佢有權令到你屋企家嘈屋翳, 家無寧日. 所以我想問高官們, 你地真係要諗諗呢個「新移民」政策, 會唔會有得「微調」呢?

呢排, 有玩開facebook既人, 都知道有個fan page「新移民冇得拎六千蚊，這是永久居民獨有的福利，要有十萬個like俾班新移民睇」, 呢件事, 只係睇到, 政府帶頭岐視「新移民」, 到現在開始有人做野, 而家 d 傳媒影響力咁勁, 我真係怕好快會有人帶頭追殺 d 「新移民」.