呢期忙報稅, 忙audit(被人audit), 忙了解新工作, 總之忙到一頭煙...... 算.....我認....係藉口, 我係懶打blog~
今日, 有dd時間, 沖左杯jasmine tea, 用ipad睇左陣報紙, 留意到一篇報導, 都可以share俾大家睇下... 而且加少少個人感受.
薪金追不上樓價 半數靠父母付首期 為子女置業 一代人供兩代樓
內容大致上七個字講曬「可憐天下父母心」, 父母唔想子女因高樓價問題而一個安樂窩都無. 決定一代供兩代樓. 講真, 父母咁做係為左子女, 無可厚非, 但係如果因為咁樣做, 而變成過份溺愛, 我就不敢恭維啦.
我諗大家都聽過「怪獸家長」呢個潮語, 80後90後既問題, 就本人而言, 有絕大部份都係因為「怪獸家長」而來.
一個人成長, 身邊有好多東西會影響到佢既思維、性格. 每一個人生階段會受唔同既人或事影響. 例如小朋友時候, 會受父母、同伴、玩意所影響; 在學時候, 會受老師、同學、功課、考試所影響; 工作時候, 會受同事、老闆、工作環境所影響; 甚至結左婚, 都會受另一半、外父外母、老爺奶奶、家庭壓力所影響. 但呢個係人生必經既階段, 人之所以成長, 都係因為有經歷. 而且, 人係需要碰壁先會長大, 人成長在一條事先定好既路上, 就只會變成時下既80後90後, 有乜時就叫救命, 向人求救, 無左自我解決問題既能力.
以上既問題, 例子多的是, 大家重記唔記得倫敦一次大雪, 有好多港童返唔到香港, 「怪獸家長們」空群而出, 投訴既投訴, 炒機票既炒機票, 作故仔既作故仔, 務求要令活在水深火熱既港童盡快回家. 我想請問家長們,你地當初送仔女去外國讀書既目的係? 唔信香港教育制度? 浸過咸水可以搵多d錢? 定係想佢地獨立? 我諗多數家長都係想仔女學識獨立. 各位家長係該次事件既反應, 會唔會有點兒「本末倒置」呢.
高樓價問題係嚴重, 的而且確政府係應該正視呢個問題, 而唔係一再賣豪宅地皮唻「火上加油」,大家睇到一有豪宅地皮賣, 樓價都會再高十幾廿個百分點就知增加供應唔係解決問題既方法, 不過都係果句: 「對果 D 等收工既人, 我不嬲都無乜期望, 無期望就唔會失望, 亦都唔會激心」
講番個今日想分享既問題, 幫係好, 無可厚非, 但點幫係一個問題. 正如我上面所講, 人既成長係建基於經歷, 想一個人成長, 唔係佢需要什麼就俾什麼.
就以報導入面既林生(林太兒子)為例, 佢一句「我假假哋也是專業人士，沒理由住這裏…… 」就反映都佢到而家都沒成長過. 你假假哋都係專業人士, 有乜理由咁同呀媽講野, 唔係佢, 你可能用唔知幾多錢租緊樓, 而家可能俾業主加租, 唔知幾時先可以賣樓呀, 衰仔!
報導中, 林太將細屋一心留給兒子結婚用(即係送啦), 但就正正係呢一個舉動, 又再一次培育左一個「怪獸仔女」, 根據報導所講, 細林生林太月入有八萬, 雖然八萬唔係真係好多, 但我真係諗唔到有乜理由係買唔到樓, 唯一可能, 佢地好大開支, 大到一個月用成六七萬, 但如果真係咁, 該對夫妻都幾離譜, 用成六七萬一個月, 但又攞左呀媽間屋, 重要講「沒理由住呢度」.... 我真係替大林太難過.
不過, 如果一開始大林太只係以借錢名義借首期俾兒子, 又或者以低市價既價錢租間屋俾兒子用, 一方面可以解決住屋問題, 又可以儲錢買佢地既 dream house, 何樂而不為呢?
p.s. 上星期我同外父外母飲茶, 講起「怪獸家長」呢個問題, 我今日未有仔女, 我重可以講話我一定唔會做一個「怪獸家長」, 但到時我真係有左細路, 我重可唔可以好肯定咁講我唔會呢? 我有疑慮, 因為我明白「當局者迷」呢一個道理.
沒有留言:
發佈留言