「政治自殺」抑或「英年早逝」

上星期五的候選特首辯論，一如外界預料，黑材料（唔知流定堅）橫飛。由舊的黑材料駡戰，到新的黑材料（閹商台及血壓中環論）傾巢而出，真係令一班花生友拍案叫絕。

可想而知，整個周末的頭條都被黑材料所籠罩，不是某某泛民議員出唻抽水，就係某某前管員出唻評論幾句，好不熱鬧！

先講講朋友間既意見，之後再講自己的愚見。

朋友們感覺上已普遍支持梁振英，他們都偏向評論唐英年的不是，比如，他應該知道什麼是保密協議，什麼是機密，如他將來做特首，會唔會只顧自己的成敗，乜都攞出唻講。我聽完之後，諗起另一則有關王立軍既新聞，中央最討厭有政界人仕，完全唔理後果，對公眾或外界交代一些敏感材料。信報紀大哥一句「人格自殺」，最能概括情況。梁振英一句「人格謀殺」，反而變得有點兒惺惺作態。

唐英年先生呢一招致諸死地而後生，真係好令我刮目相看，即刻覺得唐生條腰骨生番出唻。王立軍事件出台都未正式完結，唐生竟然敢用自己既仕途作為賭注，我敢講，如果唐英年先生所言屬實，梁振英先生將面臨是次候選特首中最大的政治炸彈，一個不留神，隨時要佢一鋪清袋，因為呢個政治炸彈係聯繫在香港人最嚮往既核心價值「言論自由」。但另一方面，呢個政治炸彈也都聯繫在唐英年先生身上，王立軍事件足以證明，好似薄熙來咁既政治人物都要落得如此下場，我估唐先生都唔方好得去邊，試問，咁重唔係「人格自殺」？我會話係「政治自殺」添呀！

唐英年先生曾出席一個青年論壇時指，年青人要多包容，不要動不動就「口誅筆伐」，剛愎自用，否則會導致香港「車毀人亡」。「口誅筆伐」意思用言語和文字來揭發、譴責他人的罪惡、罪狀。

但如果唐英年先生所言屬虛，我相信佢不單只「車毀人亡」，隨時「英年早逝」！

有好多朋友問我，覺得唐英年先生既新材料是真是假，我反而會問佢：有關係嗎？我又唔係千二人中的一人，我無權投票，唔係唔係，應該話係我之前投左票俾一些人去幫我投票。那些人點諗，我亦無權改變。

既然如此，我們根本無必要去研究材料是真是假，我都係坐定定，買定花生，睇下星期日係隻狼嬴呀，定係隻豬嬴呀，可能最後，係個「仁」嬴左呢？